Tre veta humbin jetën nga zjarri

Në shtëpinë e kapluar nga zjarri në Uebeschi të Thinit jetonin një çift plak dhe një nip i tyre, kështu që besohet se të vdekurit janë pikërisht ata

Një zjarr që ka shpërthyer në një pleme në fshatin  Uebeschi të Thunit, kantoni i Bernës, u ka marrë jetë ntre personave. Siç bën të ditur policia, kjo tragjedi ka ndodhur në natën në mes të të mërkurës dhe të enjtes, me ç`rast janë djegur në tërësi  si plemja ashtu edhe shtëpia afër saj.

Policia është alarmuar rreth orës 3 të mëngjesit. Ndërsa kur zjarrfikësit kanë mbërritur në shtëpinë e goditur nga zjarri, kanë gjetur çdo gjë tashmë të djegur, si shtëpinë ashtu edhe objektet përcjellëse të saj. 

Për shkak të sanës që ishte e magazinuar në pleme, shuarja e zjarrit paraqitej shumë e vështirë për ekipin zjarrfikës. 60 zjarrfikës kishin ardhur për të shuar zjarrin dhe shpëtuar viktimat. Por, për tre veta që ndodheshin në atë shtëpi, ndërhyrja ishte e vonuar, ata kanë humbur jetën nga zjarri.

Në atë shtëpi jetonin një çift plak dhe një nip i tyre, kështu që besohet se të vdekurit janë pikërisht ata. Një grua, e cila ishte mysafire në shtëpi, ka pësuar vetëm lëndime të lehta dhe është liruar shpejt nga spitali, ka njoftuar policia kantonale.
(Albino.ch&sda)