Chodorkowskit i jepet leja e qëndrimit në Zvicër

Mediet zvicerane njoftojnë se Chodorkowski planifikon të marrë me qira një shtëpi në Rapperswil-Jona (kantoni i St. Gallenit)

Ish pronari i koncernit të naftës Yukos, Michail Chodorkowski, i njohur si kritik i Putinit dhe më vonë si i burgosur politik i tij, ka marrë lejen e rregullt të qëndrimit në Zvicër. Autoritetet zvicerane ia kanë dhënë atij këtë të drejtë pasi që ai kishte zgjedhur Zvicrën si vend për të jetuar në të ardhmen.

Një lajm të tillë e ka publikuar së pari gazeta “NZZ am Sonntag” dhe pastaj e ka konfirmuar edhe Enti Federal për Migracion.

Mediet zvicerane njoftojnë se Chodorkowski planifikon të marrë me qira një shtëpi në Rapperswil-Jona (kantoni i St. Gallenit), buzë liqenit të Cyrihut. Familja e ish oligarkut rus jeton në Zvicër, gjegjësisht dy nga fëmijët e tij ndjekin shkollën në kantonin St Gallen.

Kritiku i njohur i Putinit është gjykuar në vitin 2005 për bishtnim të tatimeve. Ndërsa në vitin 2013 ai është amnistuar në mënyrë të papritur nga presidenti rus Putin dhe është liruar nga burgu.

Menjëherë pas kësaj, Chodorkowski ka shkuar në Gjermani dhe pastaj në Zvicër ku është strehuar familja e tij.