Erdhi vera në Zvicër: 26.2 gradë në Tesinë!

Mot i ngrohtë është regjistruar sot edhe në regjionet tjera, në veri të Gotthardit. Në Honau të Lucernit është shënuar temperatura 18.1 gradë celsius

Pavarësisht nga fakti se sipas kalendarit ende nuk ka ardhur as pranvera, termometri në muret e Zvicrës ka shënuar sot ardhjen e stinës së verës! Në të vërtetë ajo që quhet “temperaturë verore” në kontinentin eevropian dhe që fillon nga 25 gradë, sot është arritur e tejkaluar në disa pika të pjesës më jugore të Zvicrës, në Tesinë.

Kështu, në Askona për shembull, buzë liqenit Lago Maggiore, janë matur temperatura prej 26.2 gradë celsius ndërsa në Locarno Monti, zhiva në termometër është ngritur deri në shkallën 25.4.

Vitin e kaluar, dita e parë me temperaturë verore ka qenë në muajin prill. Ndërsa edhe më herët se sivjet “vera” ka ardhur në Zvicüer në vitin 2000, më 9 mars.

Mot i ngrohtë, por jo aq sa në Tesinë, është regjistruar sot edhe në regjionet tjera, në veri të Gotthardit. Në Honau të Lucernit, për shembull, është shënuar temperatura 18.1 gradë celsius.

Edhe javën e kaluar në Zvicër janë shënuar temperatura prej 20 gradësh. Ndërsa edhe java që vjen, sipas meteorologëve do të karakterizohet me mot të ngrohtë. (sda)