Burkhalter në hapje të panairit të veturave në Gjenevë

Duke filluar nga 6 marsi, për njëmbëdhjetë ditë rresht, Gjeneva do të jetë “kryeqytet” botëror i automobilave

Presidenti i Konfederatës së Zvicrës, Didier Burkhalter, ka hapur të enjten  zyrtarisht edicionin e 84-t me radhë të panairit të automobilave  „Geneva Motor Show“. Deri në 16  mars prodhuesit  e automobilave nga e gjithë bota do t’i tregojnë të rejat e fundit  në fushën e automobilistikes.

Mbi 150 vetura mund t’i shihni për herë të parë në Gjenevë.  105 prej tyre do të jenë premierë botërore , 41 janë paraqitur për herë të parë në Evropë . Panairi pritet të tërheqë këtë vit për njëmbëdhjetë ditë me radhë  rreth 700.000 vizitorë në sallat e ekspozitës së veturave në aeroportin e Gjenevës .

Presidenti Burkhalter  ka  përmendur në fjalimin e tij në hapje sfidat në mbrojtjen e planetit që duhet të adresohen për të rinjtë sot dhe nesër që të jetojnë mirë .

” Ekspertët parashikojnë se raporti i fundit do të jetë edhe më alarmant. ” tha Burkhalter . Ndryshimi i klimës kërkon një përgjigje nga politika, shkenca dhe teknologjia, tha presidenti i konfederatës zvicerane.

Gjatë dy ditëve të para të hapjes, më shumë se 10 mijë përfaqësues të mediave nga e gjithë bota do të marrin pjesë në 65 konferenca për media të prodhuesve më të mëdhenj të automobilave.

Programi për këtë vit përfshin mbi 900 automjete, një test për makinat elektrike, një koleksion të mrekullueshëm të automjeteve në ekran dhe një retrospektivë të automobilave të viteve të 90-ta.