Tetë vjet apo dhjetë për një pasaportë zvicerane?

E kontestueshme në mes të dy dhomave të Parlamentit mbetet koha që duhet të kalojë i huaji në Zvicër për të pasur të drejtë të kërkojë shtetësinë zvicerane

Me rishikimin e Ligjit mbi natyralizimin (fitimin e shtetësisë zvicerane) janë ashpërsuar kriteret për natyralizim të të huajve. Mirëpo, edhe pse ka kaluar një periudhe e konsiderueshme, dy dhomat e parlamentit nuk po munden të bien në ujdi për një zgjidhje të përbashkët. Kështu, komisioni për politika shtetërore i Dhomës së Kantoneve në mbledhjen e mbajtur të hënën ka vazhduar të këmbëngulë në qëndrimin e tij të marrë më herët, për qëndrimin prej tetë vitesh në Zvicër si kusht.

Ndërsa pika në të cilën të dy dhomat janë unike është ajo që parasheh vizën C (Qëndrimi i përhershëm) si parakusht për të fituar shtetësinë. Por, ajo që mbetet e kontestueshme është koha që duhet të kalojë i huaji në Zvicër për të pasur të drejtë të kërkojë pasaportën (shtetësinë) zvicerane. Dhoma Nacionale kërkon 10 vite ndërsa ajo e kantoneve, tetë vite.

Shumica në këtë dhomë janë shprehur kundër ashpërsimit të mëtejmë në këtë pikë pasi që edhe ashtu kushtet bazë për natyralizim do të ashpërsohen.

Komisioni për politika shtetërore ngul këmbë që koha në mes të vitit të dhjetë dhe të njëzetë të moshës së fëmijëve duhet të numërohet dyfish sa i takon natyralizimit dhe jo koha nga mosha 5 deri në atë pesëmbëdhjetë vjeçare. Ky komision rekomandon që në kohëzgjatjen e qëndrimit  në kanton dhe në llogaritjen e kohës së kaluar në Zvicër me status të përkohshëm (F) të mbahet qëndrimi që ka marrë Dhoma e Kantoneve.

Por, ai rekomandon njëkohësisht që të bëhet një ndryshim sa i përket kritereve për integrim të suksesshëm. Në vend se të kërkohet vetëm njohja gojore e gjuhës,  sipas komisionit duhet kërkuar si kusht në këto raste edhe njohja  e gjuhës së shkruar. (albinfo.ch&sda)