Gjykata Federale liron “Carlos”-in nga burgu

Me këtë vendim Gjykata Federale ka hedhur poshtë vendimin e mëparshëm të Gjykatës së Lartë të Cyrihut

Para disa muajsh rasti “Carlos” kishte pushtuar hapësirat e gazetave dhe të medieve elektronike të Zvicrës. Bëhej fjalë për një të ri delinkuent me prejardhje latinoamerikane, të cilit, në emrin e risocializimit, shteti i kishte paguar shuma të mëdha parash. Mes tjerash, atij i paguhej edhe një trajner i thaiboksit! 

Në fund atij i ishin hequr privilegjet dhe ishte vendosur në një burg normal.

Por, në një vendim që Gjykata Federale e Zvicrës e ka bërë publik sot, i riu i njohur me emrin Carlos duhet të lirohet menjëherë nga dënimi që është duke e vuajtur  në burgun Uitikon Cyrih. Me këtë vendim Gjykata Federale ka hedhur poshtë vendimin e mëparshëm të Gjykatës së Lartë të Cyrihut.

Kjo gjykatë detyrohet që për Carlosin të sigurojë sërish një trajtim përkujdesjeje socialpedagogjike 24 orëshe. Sipas Gjykatës Federale, mbajtja e të riut në një qendër të tipit të mbyllur (burg) nuk mund të arsyetohet. Ky veprim është bërë si pasojë e presionit të madh të medieve dhe të opinionit publik, konstaton gjykata.