Berna parasheh 24 mijë kërkesa azili për këtë vit

Gjatë vitit të kaluar, në Zvicër kanë kërkuar azil 21465 persona, që është për 25 për qind më pak se në vitin 2012

Zyra Federale për Migracion (BFM) parashikon që gjatë këtij viti në Zvicër të ketë rreth 24 mijë kërkesa të reja për azil. Këtë e ka konfirmuar të premten para medieve Barbara Büschi zëvendësdrejtoreshë e BFM-së. 

Gjatë vitit të kaluar, në Zvicër kanë kërkuar azil 21465 persona, që është për 25 për qind më pak se në vitin 2012. Në të njëjtën kohë në shtetet e Bashkimit Evropian është shtuar numri i azilkërkuesve për 27 për qind në krahasim me një vit më parë, duke arritur në 445 mijë.

BFM pret  që trendi aktual i numrit të azilkërkuesve të mbetet edhe gjatë vitit 2014 i pandryshuar.

Autoritetet nga Berna në kuadrin e një ristrukturimi të politikës së azilit kanë planifikuar që në nivel të qendrave federale të azilit të ngrihet numri i shtretërve për azilkërkuesit nga 2100 sa janë sot në 5000 sish.
(albinfo&sda)