Ministri francez: Rezultati i votimit në Zvicër “vetëvrasje kolektive”

Këtë konstatim ministri socialist e ka bërë para zgjedhjeve lokale të Francës ku pritet rritje e mbështetjes për partinë e ekstremit të djathtë “Front National”.

Pas deklarimit një javë më parë të ministrit të jashtëm francez Fabius se Franca do t`i rishikojë marrëdhëniet diplomatike me Zvicrën, është dëgjuar edhe një deklaratë e fortë nga nivelet qeveritare të vendit fqinj

Ministri francez i industrisë Arnaud Montebourg, duke folur lidhur me rezultatin e referendumit të 9 shkurtit në Zvicër, rezultat ky që rikthen politikën e kontingjenteve të punëtorëve nga BE, e ka quajtur këtë “vetëvrasje kolektive” për Zvicrën.

“Kam respekt të madh për të drejtën e përgjithshme të votimit, por kjo është vetëvrasje kolektive për zviceranët”, ka thënë Montebourg për radion France Inter, transmeton agjencia zvicerane e lajmeve sda/ats. Si ndëshkim do të mund të rriten doganat për eksportet zvicerane. Në këtë mënyrë Zvicra po i kontribuon vetë varfërimit të saj.

Votimi i 9 shkurtit ka treguar, sipas Montebourg, se si mund t`i ndryshojnë ligjet politikanët e të djathtës radikale. Këtë konstatim ministri socialist e ka bërë dy muaj para zgjedhjeve lokale të Francës ku pritet rritje e mbështetjes për partinë e pozicionuar kundër të huajve “Front National”.