Ndahet nga jeta Vaçe Zela

Nga mesi i viteve `90 artistja e madhe e këngës jetonte në Bazel të Zvicrës

Artistja e madhe e skenës muizikore shqiptare, Vaçe Zela ka humbur betejën e saj të fundit. Ajo është ndarë mbrëmë nga jeta, në Bazel të Zvicrës, ku jetonte prej vitesh me familjen. Lajmin për shuarjen e saj e konfirmojnë nga familjarët e saj në Zvicër.

Vaçe Zela lindi në Lushnjë në vitin 1939 dhe më 7 prill të këtij viti do të mbushte 75 vjeç. Ajo është gruaja e parë shqiptare e nderuar sa ishte gjallë me titullin “Nderi i Kombit”. Me dëshirën e saj, artistja e madhe shqiptare Vaçe Zela do të prehet në atdhe.

“Zëri i Artë i Shqipërisë”, “Ikona e Shenjtë e Këngës Shqiptare”, “Mbretëresha e Këngës Shqiptare”, “Ylli Polar që vërtitet i vetëm në Galaktikën e Këngës së Lehtë Shqiptare”, “Gjigantja e Skenës Shqiptare”. Këto janë vetëm disa nga epitetet për këtë simbol tashmë të kthyer në legjendë. U zbulua rastësisht në moshë të re në Lushnjë. Vaçe Zela kishte një zë të jashtëzakonshëm. Me zërin e saj mahnitës e të papërsëritshëm për më shumë se 40 vjet krijoi mitin e saj të pavdekësisë, duke hyrë në zemrën e çdo shqiptari brenda e jashtë atdheut. Këngët e saj në vite mbeten popullore dhe të preferuara edhe sot nga publiku. Vaçe Zela është larguar përfundimisht prej skenës në vitin 1992. Sidoqoftë Vaçe Zela mbetet “zëri i jashtëzakonshëm” që mbushte me energji skenat shqiptare, duke u bërë idhulli i shumë brezave.

Vaçe Zela i dhuroi publikut shqiptar si edhe Historisë së Muzikës Shqiptare zërin e saj të artë. Një kulm që nuk do të shlyhet kurrë nga kujtesa artistike. Vaçe Zela ka marrë pjesë në shumë festivale të muzikës në radio dhe më vonë në radiotelevizion që prej organizimit të parë të tyre, duke fituar plot 12 çmime të para, një rekord i paarritur deri më sot. Vaçe Zela është fituesja e parë e Festivalit të Parë. Me këngën “Fëmija i parë”, ajo dëshmoi se një idhull i muzikës po lindte atë mbrëmje të 26 dhjetorit të vitit 1962.
Repertori i saj është shumë i pasur, ku numërohen me dhjetëra këngë popullore, të lehta, kantata, balada etj. Ajo ka një kontribut të rëndësishëm edhe në muzikën e filmit, ku ka interpretuar shumë këngë si pjesë e muzikës së filmave. 

Ajo është e vetmja femër shqiptare e nderuar për së gjalli me Urdhrin “Nderi i Kombit” nga presidenti Alfred Moisiu me motivacionin: “Për vlerat e rralla si Artiste e Shquar, me popullaritet të jashtëzakonshëm, për interpretimin mjeshtëror të këngës së muzikës së lehtë dhe asaj popullore, për pasurinë e vyer që krijoi në shkollën shqiptare të interpretimit muzikor”. Për nder të këngëtares, viti 2009 është shpallur nga Ministria e Turizmit, Kulturës, Rinisë dhe Sporteve si “Viti Vaçe Zela”. Së fundi, edhe një rrugë në Tiranë mban emrin e saj.

Nga mesi i viteve 90 të shekullit të kaluar Vaçe Zela jetonte në Bazel të Zvicrës. Jashtë skenës së muzikës por e rrethuar nga dashuria e adhuruesve të shumtë të këngës së saj. Vaçja, ndonëse me shëndet të rënduar, ka qenë për gjithë këto vite mjaft e pranishme dhe e pritur kudo me respekt e adhurim në jetën e komunitetit shqiptar të Zvicrës.

Në vitin 2009, në shtatëdhjetëvjetorin e saj të lindjes, komuniteti i këtushëm shqiptar në bashkëveprim me institucionet e shtetit shqiptar kishte organizuar për nderë të saj një aktivitet asrtistik jubilar të nivelit çfarë e meritonte artistja e madhe.