Iniciativë për një Këshill Federal me 9 anëtarë

Kantoni i vetëm italian, Tesina, që nga viti 1999, kur kishte dhënë dorëheqje Flavio Cotti, nuk ka pasur më asnjë përfaqësues në qeverinë e vendit

Riaktualizohet sërish ideja që Këshilli Federal i Zvicrës (qeveria) të ketë më shumë se 7 ministra, sa ka sot. Komisioni për Politika Shtetërore i Dhomës së Kantoneve në Parlament  e ka votuar me shumicë votash një iniciativë parlamentare që shkon në këtë drejtim, njofton Shërbimi për medie në Parlamentin e Zvicrës. Iniciativa vjen nga komisioni përkatës i dhomës tjetër, asaj nacionale të parlamentit dhe ka për synim ngritjen e përfaqësimit në qeveri të bashkësive gjuhësore, në këtë rast asaj italishtfolëse.

Kantoni i vetëm italian në Zvicër, Tesina, që nga viti 1999, kur kishte dhënë dorëheqje Flavio Cotti, nuk ka pasur më asnjë përfaqësues në qeverinë e vendit.

Ndryshe, komisioni i përmendur i Dhomës së Kantoneve pret që me shtimin e dikastereve ministrore, barra e punës të ndahet në më shumë persona se që kjo bëhet sot. Pasi që të dy komisionet e kanë miratuar një iniciativë të tillë, komisioni përkatës i Dhomës Nacionale autorizohet të bëjë një projekt për ndryshimin e kushtetutës në këtë pikë.

Para kësaj iniciative ka pasur edhe disa përpjekje të ngjashme për rritjen e numrit të ministrave në qeverinë e Zvicrës por të gjitha kanë dështuar. Së fundi, para një viti, Dhoma e Kantoneve pati hedhur poshtë iniciativën e kantonit të Tesinës për rritjen e numrit të ministrive në 9 sish, ndonëse komisioni për politika shtetërore pati votuar pro.