SECO tërheq vërejtjen kundër lojërave ilegale të fatit

Ndër faqet e tilla të identifikuara si ilegale janë www.onlinecasinoschweiz24.ch, www.casino-zuerich.com dhe swisscasinoonline.eu

SECO (Sekretariati Shtetëror për Ekonomi) tërheq vërejtjen për faqet e internetit të cilat ofrojnë lojëra fati online që janë ilegale. Sipas saj, është një numër faqesh të tilla, të cilat prezantohen me shenjat si “Schweiz” ose “Zürich” etj dhe bartin stema apo shenja tjera identifikuese zvicerane por në fakt nuk kanë të bëjnë asgjë me Zvicrën.

Ndër faqet e tilla që SECO i ka identifikuar si ilegale janë www.onlinecasinoschweiz24.ch, www.casino-zuerich.com dhe swisscasinoonline.eu. Në këto faqe ofrohen lojëra të ndryshme fati të cilat në Zvicër janë të ndaluara.

Siç ka zbuluar SECO, njëra nga këto faqe drejtohet nga Gjibraltari, një tjetër ka selinë në Belize etj.

Firmat që operojnë me këto lojëra fati duke përdorur shenja identifikuese zvicerane bëjnë shkeljen e ligjit federal kundër konkurrencës jolojale dhe atij për mbrojtjen e simboleve të shtetit.

Lojërat e ofruara në këto portale asnjëherë nuk janë lejuar nga Komisioni Federal për Lojëra të fatit, thuhet në komunikatën e SECO-s. Kështu, bazuar në ligjet në fuqi, transmetimi i lojërave të fatit përmes internetit është i ndaluar.

Ndërkaq, SECO nuk ka vendosur ende nëse do të ndërmarrë veprime juridike, ka thënë një zëdhënës i saj, shkruan tagblatt.ch. Ndjekja penale e operuesve me portalet e tilla është e vështirë, ndonëse në një rast ajo ka funksionuar, kur operuesi qe detyruar të hiqte stemën zvicerane nga portali.