Propozohet heqja e vagonave të klasit të parë

Kërkohet që së paku nga trenat regjionalë dhe në kohën e ngarkesave më të mëdha të trenave, të hiqen nga kompozicionet e trenave vagonët e klasit të parë

Trenat e rrjetit hekurudhor të Zvicrës së shpejti mund të mbeten pa klasin e parë (1) që shfrytëzohet nga të privilegjuarit, që kane mundësi të paguajnë më shtrenjtë për biletat e tyre. Kjo mundësi e përfolur edhe më parë, është aktualizuar ditëve të fundit nga sindikata e studentëve dhe nxënësve të Tesinës Sisa. Ajo kërkon që së paku nga trenat regjionalë dhe në kohën e ngarkesave më të mëdha të trenave, të hiqen nga kompozicionet e trenave vagonët e klasit të parë,  për tu zëvendësuar me ata të klasit të dytë.

“Ne nuk e kuptojmë se si ka mundësi që vagonët e klasit të dytë të jenë të stërmbushur ndërkohë që ata të klasit të parë anë vetëm gjysmë të mbushur”, thonë iniciatorët e këtij ndryshimi.

Ndërkaq, kërkesave për heqjen selektive të vagonëve të klasit të parë i është bashkuar edhe një politikane. Deputetja e Parlamentit Nacional Aline Trede që vjen nga partia e gjelbër ka premtuar se në sesionin pranveror do ta bëjë një mocion parlamentar në këtë drejtim.

Edhe ajo thotë se i pengon që vagonët e klasës së dytë janë shpesh të stërmbushur me udhëtarë dhe familje, ndërkohë që ulëset e klasës së parë mbeten të zbrazëta. Për këtë arsye Trede propozon që në fundjavë të mbushen vagonët e të dyja klasave. “Kjo kursen energji dhe është më  e arsyeshme nga aspekti ekologjik”, shkruan 20minuen.ch.

Por këto propozime nuk u pëlqejnë aspak atyre që kanë abonime të klasit të parë. Kështu, një përfaqësues i organizatës që mbron interesat e udhëtarëve të trenave “Pro Bahn” ka thënë se një gjë e tillë do të ishte e papranueshme për ata që kanë abonime të (të shtrenjta) klasit t parë. “Për çmimin që paguaj, natyrisht qe nuk dua që kushdo të ulet në vagon, në vendin përballë meje” ka thënë ai.