Sërish rritje e numrit të të papunëve

Në fund të vitit janë regjistruar sërish më shumë njerëz të papunë në Zvicër

Shkalla e papunësisë u rrit nga 3.2 për qind, sa ishte në nëntor, në 3.5 për qind në dhjetor.

Mesatarisht për gjithë vitin 2013 llogaritet të kenë qenë 3.2 për qind të papunë në krahasim me 2.9 për qind sa ishin në vitin 2012.

Numri i të papunëve në Zvicër është rritur në muajin dhjetor të vitit 2013 për 10.364 të papunë, në 149. 437 njerëz.

Shkalla e papunësisë llogaritet në nivel vendi të jetë në 3.5 për qind. Në nëntor ishte raportuar për 3.2 për qind të papunë.

Që nga maji 2010 nuk është raportuar për më shumë njerëz të papunë në Zvicër sesa në fund të vitit 2013.

Rritja e papunësisë në dhjetor ishte më shumë për shkaqe sezonale. Sekretariati për Çështje  Ekonomike (SECO) thotë se shifrat janë në përputhje me pritjet.

Papunësia e të rinjve mes moshës 15 dhe 24 vjeç u rrit në dhjetor me 3.4 për qind, në 19.981 të papunë. Krahasuar me të njëjtin muaj të vitit të kaluar, megjithatë paraqet një rënie prej 1.8 për qind. Një total prej 205.802 punëkërkuesish janë regjistruar në muajin dhjetor.

Edhe pse thuhet të jetë rritur ekonomia e vendit gjatë vitit 2013 për 2 për qind, shkalla e papunësisë është rritur nga 2.9 në 3.2 për qind. Kjo për faktin se tregu i punës zakonisht është i vonuar për t’i dhënë përgjigje gjendjes ekonomike.