Shumica e refuzojnë iniciativën e SVP-së për migracionin

Nisma e SVP-së për migracionin është refuzuar, sipas një sondazhi nga 53.5 për qind e të anketuarve

 Vetëm 36 për qind e mbështesin iniciativën, për të cilën do të votojnë zviceranët më 9 shkurt në Zvicër.

Sipas institutit “Isopublic”, në Zvicrën Perëndimore kanë thënë se do të votojnë për iniciativa vetëm 28.3 për qind, transmetojnë «SonntagsZeitung» dhe «Le Matin Dimanche».

Nismën e ECOPOP për ndalimin e mbipopullimit, i cili kërkon një kufi vjetor të migracionit prej 0.2 për qind, e kanë refuzuar  46.2 për qind e të anketuarve. 33.4 për qind thanë se do ta mbështesin iniciativën në fjalë. Më shumë se një e pesta e të anketuarve, sipas hulumtimit, nuk kanë vendosur ende se çfarë do të donin të votonin në referendum.

Marrëveshja për lëvizje të lirë me Kroacinë, kundër së cilës SVP dëshiron të nisë një referendum, do të miratohet me 48.4 për qind. Iniciativa në fjalë do të refuzohet me 33.9 për qind, ndërsa 17.7 për qind ishin ende të pavendosur, sipas sondazhit.

Pavarësisht rezultateve negative të anketës, ish-këshilltar federal, Christoph Blocher, ka shprehur besimin rreth fushatës së referendumit.

“Sa më gjatë që ne presim për një kufizim të emigracionit të tepruar, gjendja do të bëhet më katastrofike”,  paralajmëroi Blocher. 

SVP nuk ka vendosur ende nëse do të mbështesë iniciativën e ECOPOP. Edhe pse iniciativa parasheh ndalimin e emigracionit, në anën tjetër sjell shumë të meta serioze.