Parlamenti kundër kuotës së grave në bordet e ndërmarrjeve

Ishte kërkuar qe një firmë të lejohej të hyjë në bursa vetëm nëse në bordin menaxhues të saj të dy gjinitë përfaqësohen me së paku nga 40 %

Dhoma Nacionale e Parlamentit të Zvicrës është shprehur kundër kuotës femërore në bordet menaxhuese të ndërmarrjeve të mëdha, të përfaqësuara në bursë. Deputetët kanë votuar me shumicë kundër dy nismave parlamentare të deputetes nga SP/PS, Susanne Leutenegger Oberholzer.

Përmes këtyre nismave ishte kërkuar qe një firmë do të lejohej të hyjë në bursa vetëm nëse plotëson kushtin që në bordin menaxhues të saj të dy gjinitë përfaqësohen në masën së paku nga 40 për qind.

Parlamenti ka hedhur poshtë po ashtu edhe mundësinë që kuota e gruas të futet edhe për bordet e ndërmarrjeve të afërta me qeverinë, si posta ose SBB (Ndërmarrja Federale e hekurudhave).

Sipas kundërshtarëve të vënies së kuotës për femrat, kjo nuk është mënyra e duhur për të promovuar barazinë e gruas.

Në komisionin përgatitor nisma e dytë kishte ende shanse por deputetët në votuan bindshëm kundër saj, 123 kundër, 55 pro dhe 3 abstenime. Për nismën e parë rezultati ishte 111 kundër, 67 pro dhe 4 abstenime.

Leutenegger-Oberholzer ka përmendur se femrat janë shumë dobët të përfaqësuara në borde, gjegjësisht 16 %.