Vrasësit të Lucie-s i hiqet kujdestaria e përjetshme

Gjykata Federale është mbështetur në dy ekspertiza psikiatrike që ardhur në përfundimin se nuk ka të dhëna se i akuzuari është i pashërueshëm përjetësisht

Gjykata Federale e Zvicrës e ka anuluar një dënim me kujdestari të përjetshme që ia kishte shqiptuar në tetor të vitit të kaluar Gjykata e lartë e Aargaut, vrasësit të një vajze 16 vjeçare, kujdestare fëmijësh. Vrasja e Lucie-s, ndër më të rëndat në kohët e fundit në Zvicër, kishte bërë bujë të madhe në opinionin e këtushëm. Gjykata kishte ardhur në përfundimin se vrasësi ishte i pashërueshëm për gjithë kohën.

Ndërsa Gjykata Federale si shkalla më e lartë e gjyqësisë ka kundërshtuar këtë vendim, duke ia hequr masën e kujdestarisë së përjetshme. Sipas gjykatës në fjalë, një dënim i tillë mund të shqiptohet vetëm për dikë që “me të vërtetë për gjithë jetën është i patrajtueshëm dhe në këtë mënyrë paraqet rrezik të pakufizuar në kohë për shoqërinë”.

Duke marrë këtë vendim, gjyqtarët e Lozanës janë mbështetur në dy ekspertiza psikiatrike. Të dyja kishin ardhur në përfundimin se nuk ka të dhëna se i akuzuari është i pashërueshëm përjetësisht.

Vrasësi i Lucie-s, ka qenë kuzhinier i papunë dhe i varur nga droga. Ai, në vitin 2009 në Cyrih e kishte joshur me premtimin se do ta bënte fotomodele. Më 4 mars të po atij viti ai e kishte sjellë vajzën në banesën e tij në Rieden të Badenit (kantoni Aargau). Pasi e kishte rrahur, e kishte prerë atë në fyt. Mbi kufomën e saj ishin gjetur gjurmë të urinës dhe të spermës së personit të akuzuar për vrasje.

Pas ankesës së bërë nga avokati i saj, Gjykata Federale në Lozanë kishte për detyrë të sqaronte se çfarë ka nënkuptuar gjykata më e ulët me konceptin “përgjithmonë i patrajtueshëm”. Sipas Lozanës, masa e kujdestarisë jepet vetëm pasi që i dënuari të ketë vuajtur dënimin, shkruan srf.ch. Një masë e kujdestarisë së rregullt është parimisht po ashtu e pakufizuar dhe mund të rishqyrtohet rregullisht. Ndërsa masa e kujdestarisë së përjetshme mund të rishqyrtohet vetëm në rastet kur ka ndonjë njohuri të re shkencore për mundësinë e trajtimit të personit nën kujdestari, përfundojnë gjykatësit në Lozanë.

Vendimi i kësaj gjykate ka ngjallur reagime të ashpra të familjes së viktimës dhe te një pjesë e opinionit.