Qyteti i Bernës ua njeh të huajve të drejtën për mocion

Si kusht për të qenë pjesë e mocionit, është leja e qëndrimit B, C ose F, mosha madhore dhe banimi prej së paku tre muajsh në Bernë

Ekzekutivi i qytetit të Bernës ka shpallur qëndrimin i cili do t`u mundësonte të huajve që të ushtrojnë të drejtën e mocionit. Nëse kjo e drejtë jetësohet, atëherë të huajt, pasi të grumbullojnë së paku 400 nënshkrime mund të ngrenë një çështje të caktuar në mocion që do t`i drejtohet institucioneve përkatëse.

Si kusht për një të huaj për të qenë pjesë e mocionit, është që ai të ketë lejen e qëndrimit B, C ose F, të jetë në moshën madhore dhe të jetë duke jetuar së paku tre muaj në Bernë. Mocioni duhet të jetë i bazuar dhe të ketë një objekt konkret shqyrtimi, për të cilin është përgjegjëse qeveria e Bernës ose populli me të drejtë vote.  

Me këtë propozim, qeveria lokale e Bernës e vë në zbatim një mocion të bërë nga fraksioni SP/JUSO dhe GB/JA.

Një rregullim i tillë, që u mundëson të huajve të shprehin shqetësimet e tyre ndaj institucioneve, funksionon që nga viti 2008 në komunën Burgdorf të kantonit të Bernës, shkruan srf.ch. në këtë qytet që është tetë herë më i vogël se Berna, mjaftojnë 30 nënshkrime për ta bërë një mocion të tillë. Por, të huajt e Brgdrorfit deri më tash nuk e kanë ushtruar asnjëherë këtë të drejtë të tyre.

Ndërkaq, në qytetin e Bernës njihet e drejta e mocionit të të rinjve. Mjaftojnë nënshkrimet e 40 të rinjve (që nuk kanë plotësuar moshën madhore) për të iniciuar një mocion. Nga viti 2003 kur është lejuar ky instrument demokratik, në Bernë janë bërë gjithsej katër mocione të të rinjve.