Dhoma Nacionale me kurs të ashpër në natyralizimin e të huajve

SVP/UDC kishte kërkuar qëndrim minimal prej 12 vitesh si kusht për shtetësinë ndërsa SP/PS, të Gjelbrit dhe të Gjelbrit Liberalë kanë votuar për shkurtim të kohës së qëndrimit në tetë vite

Dhoma Nacionale e Parlamentit të Zvicrës do të këmbëngulë edhe më tutje në mbajtjen e kritereve të ashpra për fitimin e shtetësisë. Në mesin e këtyre kritereve është ai që përcakton se askush nuk mund të kërkojë të natyralizohet pa i mbushur dhjetë vjet qëndrim në Zvicër. Me këtë këmbëngulje Dhoma Nacionale mbetet më rigoroze në krahasim me Dhomën e Kantoneve e cila kërkon tetë vjet qëndrimi.

Partia SVP kishte kërkuar qëndrim minimal prej 12 vitesh si kusht për shtetësinë ndërsa partitë si SP/PS, të Gjelbrit dhe të Gjelbrit Liberalë kanë votuar për shkurtim të kohës së qëndrimit në tetë vite, shkruan srf.ch.

Ndërkaq, dy dhomat pajtohen në një pikë: të dyja kërkojnë që të huajt të cilët duan të fitojnë shtetësinë zvicerane duhet që më parë të kenë të drejtën e qëndrimit të përhershëm në Zvicër, gjegjësisht vizën C. Po këtë qëndrim e kishte propozuar edhe qeveria federale. Por, në të njëjtën kohë, qeveria kërkon që qëndrimi minimal në Zvicër të jetë tetë vite dhe jo 12 sa ka që deri tash. Kërkesë kjo me të cilën Dhoma e Kantoneve është pajtuar.

Një pikë tjetër ku dallojnë qëndrimet në mes të dy dhomave është llogaritja e kohës që të huajt e kanë kaluar me status të përkohshëm (vizë F). Përderisa Dhoma e Kantoneve është që kjo kohë duhet të llogaritet në favor të stazhit të nevojshëm për të fituar shtetësinë, Dhoma Nacionale është kundër.  

Kjo e fundit ka vendosur kështu me shumicë votash 107: 73 dhe 11 abstenime. Ministrja e drejtësisë, Simonetta Sommaruga ka kundërshtuar ashpër këtë qëndrim, i cili për tu bërë i plotfuqishëm sërish duhet të kalojë në Dhomën e Kantoneve.