Sërish ashpërsohet kriteri i bashkimit familjar për sirianët

Familjet pritëse siriane në Zvicër obligohen ndaj shtetit, mes tjerash se do të kujdesen për familjarët e tyre së paku tre muaj

Pas aktit ë zemërgjerësisë që Zvicra kishte treguar fillimisht kundrejt refugjatëve sirianë, të cilët duan t`u bashkohen familjarëve të tyre në Zvicër, në horizont duken shenja tërheqjeje. Zyra Federale për Migracion (BFM) pati proklamuar gjatë shatorit se bashkimi familjar në rastet e sirianëve do të bëhej pa shumë formalitete. Por fluksi i rritur dukshëm gjatë muajit të fundit i atyre që kanë bërë kërkesa për të ardhur në Zvicër mbi këtë bazë ka shtyrë t`i kthehet realitetit të ashpër. Dhe, ka ashpërsuar kriteret për një gjë të tillë.

Siç tregon një kronikë e bërë nga emisioni “10vor10” i televizionit publik zviceran, BFM arsyeton ndryshimin e kursit me faktin se nga ajo kohë në Zvicër kanë ardhur më shumë se 600 sirianë dhe se shumica e tyre kanë kërkuar azil në qendrat e këtushme të pranimit.

Në emision tregohen raste të ndryshme ku sirianëve me qëndrim në Zvicër u kanë ardhur numër i madh i “mysafirëve” të tillë, të cilët, në pamundësi për t`i mbajtur,  i kanë udhëzuar të paraqiten për azil. Dhe kjo paraqet devijim nga oferta që kishte dhënë Zvicra: ajo nënkuptonte që të ardhurit të strehoheshin dhe mbaheshin nga familjarët e tyre në Zvicër.

Për pasojë, BFM tash ka marrë vendimin që familjet pritëse siriane në Zvicër të marrin detyrime ndaj mysafirëve të tyre. Ata obligohen ndaj shtetit, mes tjerash se do të kujdesen për familjarët e tyre së paku tre muaj.

Nga ana tjetër organizata që mbron  refugjatët “Flüchtlingshilfe” e ka kritikuar këtë qasje, duke thënë se në këtë mënyrë bashkimi i proklamuar familjar po bëhet pothuajse i pamundur.