Pauza të paguara për nënat që u japin gji fëmijëve të tyre

Për më shumë se katër orë punë, kompensimi do të jetë në lartësinë e pagesës për 60 minuta punë. Ndërsa për më shumë se shtatë orë në ditë, ky kompensim do të jetë 90 minuta

Në Zvicër në të ardhmen nënave që rrisin fëmijë të vegjël dhe janë në marrëdhënie pune do tu kompensohet koha e kaluar duke ushqyer me gji fëmijët e tyre. Kjo, sipas një rregulloreje të dërguar për miratim në parlament nga SECO (Sekretariati Federal për Ekonomi) parashikohet të funksionojë në këtë mënyrë: nënat do të kompensohen nga shteti brenda një viti për dhënien gji fëmijëve të tyre, në vend pune ose jashtë tij. Rregullorja duhet të bëhet pastaj pjesë e ligjit të punës.

Brenda një orari pune prej më shumë se katër orësh, kompensimi në të holla këtyre nënave do t`u bëhet në lartësinë e pagesës për 60 minuta punë. Ndërsa atyre që punojnë më shumë se shtatë orë në ditë, ky kompensim do tu vlerësohet si 90 minuta punë.

Propozuesi ende nuk e ka një parallogarit se sa do të kushtojë e gjithë kjo. Sipas SECO-s, edhe tash në praktikë dhënia gji fëmijëve gjatë kohës së punës nuk paraqet ndonjë problem të madh. Shumë ndërmarrje tashmë e bëjnë edhe kompensimin në të holla për nënat që u japin gji fëmijëve. Por megjithatë, ajo që nevojitet është një rregullim i qartë i kësaj problematike. Kjo për faktin se në Zvicër ka ndërmarrje të cilat punëdhënësi ua ka shkurtuar të ardhurat nënave që kanë bërë pauzë për t`u dhënë gji foshnjave të tyre.

Por, Federata e Punëdhënësve nuk pajtohet me këtë rregullim të ri. “Mua më duket e tepruar dhe e dëmshme kjo që kërkon rregullorja e re” ka thënë Ruth Derrer Balladore, anëtare e udhëheqjes së kësaj federate. Sipas saj, një pauzë prej 60 minutash brenda një dite të plotë pune, për dhënie gji, e kompensuar nga punëdhënësi, do të ishte plotësisht e mjaftueshme.

Veç kësaj ajo e konsideron mangësi që nuk është shkruar se gratë duhet të jenë në vend të punës gjatë kohës sa u japin gji fëmijëve të tyre. “Kështu si është paraparë, mund të ndodhë që ato gjatë tërë vitit të lëshojnë punën një orë e gjysmë më herët, me pretekst të dhënies gji. Si pikë e fundit, sipas saj do të pësojnë vetë gratë e reja, të cilat, për këtë shkak do të jenë më pak të pranueshme në tregun e punës.