Zvicër: 50 islamistë të rrezikshëm dhe 1000 ithtarë të tyre

Ekziston një skenë radikale islamike e Zvicrës e cila mbështet “luftën e shenjtë kundër të pafeve”, por, ajo është e vogël. Janë gjithsej 50 persona aktivë dhe të gatshëm për dhunë.

Zvicra, ndonëse si vend neutral konsiderohet se është larg nga zhvillimet në lidhje me radikalizmin islamik, nuk është krejtësisht e privuar nga njerëzit me qëndrime radikale e të gatshëm për dhunë. Të tillë janë rreth 50 ndërsa pak më shumë se 1.000 të tjerë simpatizojnë personat nga qarqet ekstreme islamike. Në këtë përfundim ka ardhur politologu Lorenzo Vidino nga universiteti ETH i Cyrihut, në një studim të tij të bërë lidhur me këtë problematikë.

Sipas tij, fusha e takimit të myslimanëve radikalë, edhe në Zvicër, është interneti. Ai sqaron se nuk është e vështirë të gjenden në internet myslimanë nga Zvicra të cilët ngarkojnë xhirime të Al-Kaidas në internet dhe të cilët flasin me entuziazëm për vrasjen e të pafeve ose që pozojnë në facebook si luftëtarë të shenjtë, me një armë zvicerane në dorë.

Studiuesi në fjalë ka hulumtuar me muaj të tërë në internet, ka vizituar njerëz dhe ka bëre intervista. Nga të gjitha këto ai ka ardhur në përfundimin se ekziston një skenë radikale islamike e Zvicrës e cila mbështet “luftën e shenjtë kundër të pafeve”, njofton srf.ch. Por, sipas tij, kjo skenë është e vogël. Vidino flet për gjithsej 50 persona aktivë dhe të gatshëm për dhunë. Disa prej tyre tashmë kanë udhëtuar për në Somali, Jemen ose Pakistan.

Përveç tyre, janë edhe rreth 1000 që kryesisht përmes internetit simpatizojnë veprimet e tyre. Por, thuhet në studim, aktivitetet nuk kufizohen vetëm në internet. Ka edhe takime fizike të ekstremistëve, para së gjithash nëpër faltoret e tyre. Në gjithë Zvicrën ka takime të tilla të grupeve të vogla.  

Por, krahasuar me vendet me madhësi të ngjashme me Zvicrën si Belgjika ose Danimarka, skena islamike ekstreme e Zvicrës është më e vogël, ka konstatuar Vidino. Kjo, veç tjerash falë aktit se Zvicra, me politikën e saj neutrale të jashtme tërheq më pak zemërimin e myslimanëve.

Por, megjithatë, prania e më shumë se 1000 myslimanëve radikalë në Zvicër që simpatizojnë Al-Kaidën, a duhet të jetë arsye për brengosje të popullatës zvicerane? “Jo”, thotë studiuesi i përmendur. Askush nuk duhet të frikësohet por syçelë duhet të jetë secili. Dhe, ai e di se kjo syçeltësi në fakt edhe është duke u ushtruar nga shteti. Nga bisedat që ai ka pasur me autoritetet, ka kuputar se islamistët e rrezikshëm të Zvicrës janë nën përgjim të shtetit.