Barroso: Zvicra rrezikon statusin e privilegjuar me BE-në

BE -ja mund t`ia heqë Zvicrës statusin e privilegjuar që ka në tregun e brendshëm evropian në rast se ajo nuk do të respektojë marrëveshjen për lëvizjen e lirë

Kryekomisionari i BE-së, Jose Manuel Barroso i ka tërhequr vërejtjen Zvicrës që të heqë dorë nga rrezikimi i marrëveshjes për lëvizje të lirë, që ky shtet e ka nënshkruar me BE-në. Kjo marrëveshje, sipas Barrosos do te rrezikohej në rast se Zvicra do të miratonte kërkesat që përmbajnë iniciativat për të cilat pritet të mbahet referendum vitin e ardhshëm.

Barroso nuk ka specifikuar se për cilat iniciativa bëhet fjalë konkretisht. Por ka thënë se Be-ja mund t`ia heqë Zvicrës statusin e privilegjuar në qasjen që ka ajo në tregun e brendshëm evropian në rast se Zvicra nuk do të respektojë marrëveshjen për lëvizjen e lirë. Këtë qëndrim e ka mbajtur kryekomisioneri në një intervistë që e ka dhënë për gazetën “NZZ am Sonntag”.

Barroso ka theksuar se shtetet anëtare të BE-së dhe nënshkruese të marrëveshjes për lëvizje të lirë nuk do të pranojnë asnjëherë që lëvizja e lirë të ndahet nga të drejtat tjera themelore.

Në vitin 2014, me iniciativën e SVP/UDC-së “kundër migracionit masiv” fillon referendumi i parë nga tre sish që do të zhvillohen dhe që lidhen me kufizimin e lëvizjes së lirë. Pas saj vjen votimi i iniciativës Ecopop për kufizimin e ardhjes së të huajve në Zvicër si dhe i treti, ai për zgjerimin e marrëveshjes së lëvizjes së lirë edhe me Kroacinë, si shtet i ri i BE-së.