Buxheti i ushtrisë, 5 miliardë franga

Deri sot qeveria mbronte qëndrimin që buxheti i ushtrisë të mos kalonte shumën mbi 4.7 miliardë franga. Aktualisht ky buxhet është 4.4 miliardë

Në një vendim që Këshilli Federal ka marrë sot, thuhet se forcat e armatosura të Zvicrës do të kenë në të ardhmen nga pesë miliardë franga në dispozicion si buxhet vjetor. Deri në këtë vendim, qeveria mbronte qëndrimin që buxheti i ushtrisë së Zvicrës të mos kalonte shumën mbi 4.7 miliardë franga. Aktualisht ky buxhet është 4.4 miliardë.

Nga ana tjetër, shumica në Parlamentin e Zvicrës ishin prej kohësh për një shtim të buxhetit. Në parlament prej dy vitesh zhvillohet një debat që bën presion për shifrën e përmendur.

Sot, përfundimisht, qeveria e ka autorizuar Departamentin e Mbrojtjes që, në planifikimin e detyrave të tij të llogarisë në një plafon prej 5 miliardë frangash. Kështu ka deklaruar të mërkurën ministri i mbrojtjes, njëherësh president i vendit, Ueli Maurer, njofton srf.ch.

Por, buxheti i ri, i rritur, do të mund të hipë në fuqi vetëm duke filluar nga viti 2016. Deri atëherë, gjegjësisht buxhetet përkatëse për vitin 2014 dhe 2015 do të jenë jo më të mëdhenj se 4.7 miliardë franga.

Rritja e buxhetit e ka miratimin e të dy dhomave të parlamentit. Ndërkaq, partitë e majta, të cilat ishin kundër rritjes së tij, kanë mbetur në pakicë. Ato thonë se, duke vendosur rritjen e buxhetit për ushtrinë, paratë do të merren nga fondet tjera, që do të thotë se do të mbeten pa u mbuluar mirë fusha si arsimi, shëndetësia, mbështetja sociale etj.