Rrëzohet aeroplani ushtarak

Ende nuk dihet nëse dikush me këtë rast ka humbur jetën apo është lënduar. Piloti konsiderohet i zhdukur

Një aeroplan i tipit F/A-18-Jet, pronë e forcave ajrore të ushtrisë së Zvicrës është rrëzuar në mesditën e të mërkurës në tokë në fshatin Lopper në mes të kantoneve Obwalden dhe Nidwalden, në regjionin  rreth Hergiswil-it.

Sipas shërbimit meteorologjik të Zvicrës, moti i ligë, me mjegull  dhe me reshje të vogla të shiut ka qenë shkaktar i rrëzimit. Ndërkohë mësohet se aeroplani, në këto kushte atmosferike është përplasur per një shkëmb të afërm.

Shërbimi për informim i forcave të armatosura të Zvicrës e ka konfirmuar  lajmin për këtë aksident, që ishte bërë i ditur më parë nga një numër portalesh zvicerane.

Ende nuk dihet nëse dikush me këtë rast ka humbur jetën apo është lënduar. Piloti konsiderohet i zhdukur.

Linja hekurudhore regjionale Brünig në mes të lokaliteteve Hergiswil dhe Alpnachdorf është bllokuar, ashtu sikurse edhe rruga automobilistike Stansdtad – Alpachstadt. Por, autostrada e afërme A8 nuk është bllokuar.