Kroatët dhe malazezët hiqen nga lista e ndalesës për armëmbajtje

Në listën “e ndaluar” mbeten edhe më tutje: Serbia, Kosova, Maqedonia, Bosnja, Shqipëria etj. Për Kosovën kjo bëhet për shkak të "tensioneve etnike në zonat kufitare ne mes të dy vendeve"

Qytetarët e shteteve të dala nga ish Jugosllavia, prej disa vitesh me një vendim të marrë vite më parë, e kishin të ndaluar të posedonin, blinin ose shitnin armë. Krahas tyre në “listën e zezë” ndodheshin edhe Shqipëria, Turqia, Sri Lanka etj.

Por, ministrja e drejtësisë dhe policisë Simonetta Sommaruga  planifikon të ndryshojë diçka në këtë drejtim. Ajo do që qytetarëve të Kroacisë (e cila tashmë bën pjesë në BE) dhe të Malit të Zi së shpejti tu mundësohet të dalin nga kjo listë. Policia federale e ka dërguar gjatë kësaj jave për shqyrtim në komisionet parlamentare gjegjëse një përshtatje të urdhëresës lidhur me armët.

Propozimi i Sommarugas vjen në mënyrë befasuese për faktin se ekspertët e sigurisë në politikën zvicerane kohëve të fundit kishin kërkuar madje zgjerimin e listës së vendeve në fjalë, dhe vetë ministria e brendshme  madje i ka trimëruar ato kërkesa, shkruan nzz.ch.

Kroacia nuk paraqet më vend të krizës dhe si vend i ri anëtar i BE-së duhet të barazohet me shtete tjera të BE-së, është argumentimi i autoriteteve zvicerane. Po ashtu edhe në Malin e Zi situata konsiderohet si stabile, kështu që nuk arsyetohet më mbajtja në fuqi e ndalesës së armëve.

Në listën “e ndaluar”  mbeten edhe më tutje: Serbia, Kosova, Maqedonia, Bosnja, Shqipëria, Turqia, Sri Lanka dhe Algjeria. Sipas Policisë Federale, nxjerrja e këtyre vendeve nga lista do të ishte tepër e hershme.

Dhe arsyetimet në këtë kontekst janë si vijon: “serbëve dhe shqiptarëve duhet të vazhdojë tu ndalohet posedimi i armëve për shkak të tensioneve etnike në zonat kufitare ne mes të dy vendeve”. Në rastin e Turqisë rrezikshmëria lidhet me konfliktin me kurdët, ndërsa në Sri Lankë vazhdon konflikti me tigrat tamilë etj.