Siemens shuan 15 mijë vende pune

Por 15 mijë veta nuk do të humbin punën. Siemens do të përpiqet të punësojë ata punëtorë në vende tjera të punës brenda koncernit.

Koncerni i madh gjerman Siemens ka vendosur të shuajë 15 mijë vende pune në gjithë botën. Këtë e ka planifikuar që ta bëjë gjatë vitit 2014, në kuadër të një programi të kursimeve, njofton agjencia gjermane e lajmeve dpa duke cituar një zëdhënës të kompanisë në Munih. Sipas këtij njoftimi, vetëm në Gjermani, do të shuhen  5000 vende pune.

Gazeta “Welt am Sontag” kishte shkruar më parë se gjatë vitit të ardhshëm Siemens do të shuante rreth 10 mijë vende pune , por deri në deklarimin e sotëm, Siemens kishte heshtur.

Por zëdhënësi ka thënë se kjo nuk do të thotë se 15 mijë njerëz do të mbeten pa punë. Sidomos në Gjermani por edhe jashtë saj Siemens do të përpiqet të punësojë ata punëtorë në vende tjera të punës brenda koncernit.