Zvicra pranon 500 refugjatë sirianë

500 refugjatët nga Siria pranohen gjatë tri viteve në vijim. Jo më herët se në tetor pritet të vijnë refugjatët e parë

Zvicra gjatë tri viteve të ardhshme do të strehojë 500 refugjatë nga Siria. Këtë vendim e ka marrë të mërkurën Këshilli Federal në mbledhjen e tij të radhës dhe e ka shpallur atë për medie.

Në kushtet e situatës dëshpëruese që po mbretëron në Siri Zvicra është e gatshme të ndërmarrë një hap të tillë, ka deklaruar qeveria e vendit përmes një komunikate për medie.

Ndërsa, sipas departamentit për çështje juridike dhe policore, Komisariati i OKB-së për refugjatë (UNHCR) tashmë i është drejtuar Zvicrës me kërkesa konkrete për pranimin e refugjatëve sirianë, shkruan nzz.ch.

 Jo më herët se në tetor pritet të vijnë refugjatët e parë nga Siria në Zvicër. Bëhet fjalë në radhë të parë për persona në gjendje më të vështirë dhe të lëndueshëm.