Zvicra ndërpret riatdhesimin e tamilëve

BFM ka vendosur që në javët e ardhshme të mos bëjë dëbime në Sri Lankë për shkakun se dy të riatdhesuar janë burgosur nga policia e atjeshme

Dy raste të burgosjes së tamilëve të kthyer nga Zvicra në Sri Lankë kanë shtyrë autoritetet zvicerane të mendojnë për rrezikshmërinë që paraqet riatdhesimi i tamilëve. Për këtë arsye Enti Federal për Migracion (BFM) ka marrë vendim të ndërpresë tash për tash dëbimin e azilkërkuesve në Sri Lankë, ka bërë të ditur për Radion RTS zëdhënësja e BFM-së Gaby Szöllösy.

Për të penguar që edhe persona të tjerë të këtij komuniteti t`i nënshtroheen një rreziku të ngjashëm, pra BFM ka vendosur që në javët e ardhshme të mos bëjë dëbime në Sri Lankë. BFM do t`i informojë edhe kantonet për këtë ndalesë, ka thënë zëdhënësja.

Ajo ka sqaruar më tutje se Ambasada e Zvicrës në Colombo (Sri Lankë) është ngarkuar për të përcjellë fatin e dy tamilëve të arrestuar. Deri në kohën kur të merret vesh se çfarë do të ndodhë me këta të dy, do të pezullohet dëbimi në këtë shtet, ka thënë Szöllösy.