Zvicra pranon refugjatë nga Siria

Zvicra do të pranojë nga Siria qindra refugjatë - fëmijë, gra shtatzëna dhe pleq

Çdo ditë rreth 8000 sirianë largohen nga shtëpitë e tyre. Shumica e tyre jetojnë në kushte çnjerëzore në kampet e Jordanisë dhe Libanit. Sipas shifrave zyrtare të OKB-së, tashmë mbi 1.6 milion njerëz kanë ikur nga shtëpitë e tyre. Më shumë se gjysma e tyre janë fëmijë.

Pritet që javën e ardhshme me kërkesë të ministres zvicerane të Drejtësisë, Simonetta Sommaruga, të vijnë qindra refugjatë në Zvicër nga Siria. Kjo është arritur në bashkëpunim me Agjencinë për Refugjatë të OKB-së (UNHCR), bëjnë të ditur gazetat “SonntagsZeitung” dhe “NZZ am Sonntag”. Sipas burimit të tyre, bëhet fjalë për 300 deri në 500 refugjatë, sidomos viktimave të luftës, fëmijë, gra shtatzëna dhe të moshuar.

Kontingjent refugjatësh me numër aq të madh nuk ka pranuar prej vitesh Zvicra. Gjithashtu edhe kantonet kanë mbështetur kërkesën e Sommarugas.

Sommaruga ka paraqitur në të njëjtën kohë para Këshillit Federal një plan për konsum vjetor për disa qindra refugjatë të luftës, shkruan “SonntagsZeitung”.