Mëso gjermanishten në kantier dhe merr para për këtë

Punëtorët që gjatë kohës së lirë ndjekin një kurs të gjermanishtes do të marrin një kompensim në të holla. Kjo gjë është arritur pas negociatave në mes të sindikatave dhe SBV.

Deri më tash projekti “Deutsch auf der Baustelle” (gjermanisht në kantier) kishte vetëm karakter të projektit-pilot. Në kuadër të tij, disa qindra punëtorë të ndërtimit mësonin gjuhën gjermane gjatë kohës së punës së paguar, në barakat e tyre në vendin e punës (albinfo.ch ka raportuar për këtë projekt). Me marrëveshjen e re, këto kurse përfundimisht mund të vazhdojnë, dhe jo më si pilot projekte.

Nico Lutz, udhëheqës i sektrit të ndërtimit në sindikatën Unia shprehet i kënaqur me këtë të arritur. “Ne e patëm bërë propozimin para pushimeve verore që kurset e gjermanishtes të ndiqen gjatë kohës së punës ose, në rast se ato lihen për në kohën e lirë të punëtorëve, atëherë, të mbështeten financiarisht.

Deri më tash punëdhënësit në ndërtimtari e kishin refuzuar një gjë të tillë. Prandaj është për tu përshëndetur që ata kanë marrë tash këtë vendim”.

Kurset do të financohen nga fondet e paritetit për kualifikim, fond ky të cilin e paguajnë së bashku punëdhënësit dhe punëtorët, kështu që paratë nuk mungojnë, shkruan srf.ch

Ata punëtorë që dëshirojnë mund ë ndjekin një kurs të gjermanishtes 50 leksione nga 50 minuta. Pas përfundimit me sukses të këtij kursi ata do të marrin si kompensim nga 750 franga, që nuk është kompensim i plotë në nivel të rrogës.

Kurset mbahen vetëm të shtunave, gjë që paraqet një problem por që, sipas Martin Senn nga Federata e Punëdhënësve në Ndërtimtari (SBV) thotë se “kjo është e pranueshme. Është konstatuar se ndjekja e kurseve gjatë kohës së punës nuk është e përshtatshme, sidomos pasi që ndjekësit e kurseve rrallë herë vijnë nga kantieri i njëjtë i punës”.

Qëllimi i kurseve të gjermanishtes në vendet e punës në ndërtimtari është që partnerët socialë të japin një kontribut për integrimin e punëtorëve të huaj në Zvicër. Të marrurit vesh në mes të punëtorëve në kantier ka shumë rëndësi, thotë kryetari i SBV, Werner Messmer, kur dihet se dy të tretat e punëtorëve janë të huaj.