Paditet Netflixi për filmin “Black Mirror: Bandersnatch”

Një shtëpi botuese është duke paditur platformën Netflix për filmin “Black Mirror: Bandersnatch”.  Kompania “Chooseco LLC”, që është botues i serisë së librave “Zgjidhni aventurën tuaj”, thotë se filmi në fjalë shkel mbi markat e saj.

Bandersnatch kishte premierën në dhjetor të 2018-ës, dhe lejon që shikuesi të bëjë zgjedhjen e tij mbi personazhet filmike, duke ndikuar kështu edhe mbi rrjedhën e filmit.  

Librat me titullin “Zgjidhni aventurën tuaj” ishin të popullarizuara në vitet e tetëdhjeta dhe të nëntëdhjeta të shekullit të kaluar, duke vendosur lexuesin në këpucët e protagonistit, me çka i mundëson atij të ndikojë në rrjedhën e ngjarjes.

Siç shkruan e përditshmja Independent, Chooseco LLC kërkon të paktën 25 milionë dollarë dëmshpërblim.