Ekspozohen produktet kosovare të drurit në tregun evropian

Gjatë muajit janar 2019, katër prodhues kosovarë nga industria e përpunimit të drurit do të prezantojnë produktet dhe zgjidhjet e tyre për enterier në panairin më të madh evropian të kësaj industrie. Është hera e tretë që Kosova prezantohet në panairin IMM Këln (Gjermani), Panairi i mobilierisë dhe enterierit.

Kompanitë ELNOR,ALBED,GRANITI DHE VENTIUS do të marrin pjesë në panairin IMM që mbahet në datat 14 – 20 janar 2019. Në panairin IMM, furnizuesit dhe vendimmarrësit nga tregjet më të mëdha të sektorit të dizajnit të enterierit nga e gjithë bota përcaktojnë të ardhmen e këtij biznesi.

Në IMM kompanitë kosovare po prezantojnë produktet e tyre, si: kuzhina, dhoma të fjetjes, divanë, tryeza, karrige, dyshekë dhe elemente të ndryshme për enterier.

“Prodhuesit kosovarë po e arrijnë me sukses synimin e tyre që të jenë të pranishëm në tregun evropian, me produktet dhe cilësinë që ofrojnë, deri tani eksportet përgjatë vitit si rezultat i pjesëmarrjes në këtë panair kanë qenë të larta”, thotë Arieta Vula-Pozhegu, Drejtoreshë Ekzekutive e Shoqatës së Përpunuesve të Drurit të Kosovës. “Pjesëmarrja në këto panaire është e një rëndësie strategjike për kompanitë dhe për industrinë e drurit të Kosovës, pasi shërben si prezantim dhe pikë hyrjeje në tregun gjerman dhe shtete të tjera në botë, pasi vizitorët janë anekënd botës”, shkruan rtk, përcjell albinfo.ch.

Pjesëmarrja e kompanive në këtë panair mbështetet nga: Ministria e Tregtisë dhe Industrisë (MTI), UNDP, përkatësisht Agjencia për Investime dhe Përkrahjen e Ndërmarrjeve në Kosovë (KIESA), USAID dhe Agjencia Suedeze për Zhvillim Ndërkombëtar (SIDA), Agjencia Gjermane për Bashkëpunim Ndërkombëtar “Deutsche Gesellschaft für internationale Zusammenarbeit (GIZ) GmbH.  Mbështetja koordinohet nga Shoqata e Përpunuesve të Drurit të Kosovës SHPDK.