Instrumente muzikore dhe mbulesa shtretërish për Shqipëri

Një aksion të shoqatës "St.Georgen hilft Albanien", për instrumente muzikore, e pati ndihmuar vitin e kaluar edhe firma "Bachmann" duke dhuruar12 piano klasike

Shoqata humanitare “St.Georgen hilft Albanien” që e ka selinë në St. Georgen të Zvicrës lindore, dhe është e orientuar për ndihmë Shqipërisë është në kërkim të instrumenteve të ndryshme muzikore dhe të mbulesave për shtretër nga materiali i lirit. Këto, sipas përfaqësueses së shoqatës, Ruth Widmer kërkohen për t`ua dhuruar shkollave të atjeshme shtetërore të artit dhe të muzikës.

“Studentët e arteve pamore mund t`i përdorin mbulesat e shtretërve si pëlhurë për të pikturuar mbi të. Për këtë arsye janë sidomos të kërkuara ato materiale që kanë sipërfaqe të lëmuar”, ka thënë Widmer.

Para këtij aksioni, shoqata e përmendur ka realizuar që nga viti 1992 e këtej një numër të madh aksionesh për të ndihmuar aspekte të ndryshme të jetës në Shqipëri. Nidhmat, si ngritja e qendrave për përkujdesje ose për të varfrit, pastaj siguimi i syzeve për personat që kanë nevojë për to, janë orientuar kryesisht në viset e izoluara malore e të varfra të Shqipërisë së veriut.

Një aksion të ngjashëm, për sigurimin e instrumenteve muzikore, të iniciuar nga shoqata “St.Georgen hilft Albanien” e pati ndihmuar vitin e kaluar edhe kompania “Bachmann” duke falur 12 piano klasike, të përdorura por në gjendje të mirë (në foto).

Ato i qenë dhuruar shkollës së arteve “Tefta Tashko-Koço” në Korçë.

Instrumentet dhe mbulesat mund të dorëzohen në adresën Bachweidstrasse 13 në St. Georgen. Ekziston po ashtu edhe mundësia që ato, sipas marrëveshjes, vetë shoqata t`i marrë nga shtëpitë e atyre që i ofrojnë, shkruan “St.Galler Tagblatt”.

Për informata më të hollësishme, në telefonin: 071 223 66 13