Përplasje pushtet e opozitë për dialogun në Kuvend

Kryeparlamentari, Kadri Veseli, i ka bërë thirrje opozitës që të unifikohen në këtë temë. Ai është shfaqur i sigurt se Hashim Thaçi do ta mbrojë Kosovën, po aq sa po tenton ta mbrojë opozita.

 

Seanca e jashtëzakonshme e thirrur nga opozita ka përplasur pushtetin e opozitën rreth dialogut me Serbinë. LDK-ja, si inicuese e këtij debati, e ka quajtur idenë e Presidentit Hashim Thaçi si hapje të deklaratës së pavarësisë së shpallur më 2008. Avdullah Hoti ka propozuar rezolutë me vetëm një pikë, e që është: territori i Kosovës është një dhe i pandashëm dhe as Presidenti e as askush tjetër nuk ka të drejtë ta negociojë. Si kundërpërgjigje, pushteti, përmes PDK-së, ka dalë me një tjetër rezolutë 6 pikëshe të cilën e ka quajtur plotësim të asaj të propozuar nga opozita.

Ndërkohë, Vetëvendosje ka kërkuar që në rezolutën e LDK-së të shtohet edhe një pikë që Hashim Thaçit ia ndalon çfarëdo takimi me zyrtarët e Serbisë. Por, përplasje nuk ka pasur vetëm mes pushtetit edhe opozitës. Debat i nxehtë është bërë edhe mes ish-bashkë partiakëve: Dardan Molliqaj e Glauk Konjufca. Molliqaj e ka akuzuar LDK-në e VV-në se më shumë po duan zgjedhje për pushtet, sesa që vërtet po mendojnë për rrjedhën e dialogut. Ai ka thënë se LDK e VV, më shumë po frikësohen nga vetja, sesa nga Hashim Thaçi, sepse kanë frikë se çkado që sjell Presidenti ata duhet ta votojnë.

Kryeparlamentari, Kadri Veseli, i ka bërë thirrje opozitës që të unifikohen në këtë temë. Ai është shfaqur i sigurt se Hashim Thaçi do ta mbrojë Kosovën, po aq sa po tenton ta mbrojë opozita.

 

 

---