Thaçi e Rama takohen në Gjenevë

Presidenti i Kosovës, Hashim Thaçi, është duke qëndruar në Gjenevë, ku ka zhvilluar një takim me kryeministrin e Shqipërisë, Edi Rama.

“Mëngjes i bukur në Gjenevë, duke shijuar kafetë dhe rrezet e diellit bashkë me Edin. Në Forumin Ekonomik Botëror, ku po marrim pjesë, me liderë të rajonit dhe ekspertë botërorë të ekonomisë, do të diskutojmë për zhvillimin rajonal dhe perspektivën tonë euroatlantike”, ka shkruar Thaçi, përcjell albinfo.ch.

Përmes një postimi në Instagram, Rama ka treguar se ka zhvilluar takim me presidentin kosovar në kuadër të tryezës së Dialogut Strategjik për Ballkanin Perëndimor.

Sipas komunikatës për media dërguar nga Zyra e Presidentit, në këtë forum, pjesëmarrësit do të diskutojnë gjerësisht rreth modaliteteve për nxitjen e bashkëpunimit ndërmjet politikëbërësve në dobi të një Ballkani të qëndrueshëm.

Duke identifikuar sfida dhe objektiva të përbashkëta, pjesëmarrësit do të diskutojnë edhe se si bashkësia ndërkombëtare përmes bashkëpunimit publiko-privat mund të mbështesë rritjen dhe stabilitetin në rajon.