Dënohet vozitësi francez që trafikoi ilegalisht dy migrantë

Një vozitës i autobusit nga Aurillac, është dënuar me 18 muaj burg nga Gjykata e Boulogne-sur-Mer në Francë, pasi ka tentuar të ndihmojë dy migrantë shqiptarë për të udhëtuar drejt Britanisë së Madhe.

Ai i mori me vete në autobusin në të cilin shoqëronte nxënës të një kolegji francez.

Më 29 prill të këtij viti, francezi është dashur të shoqërojë rreth pesëdhjetë nxënës të kolegjit në Britani të Madhe, për një udhëtim pedagogjik.

Mirëpo, para se të kalojë në Manche, në Calais ai është hetuar nga rojet kufitare dhe është arrestuar menjëherë, pasi migrantët shqiptarë i kishte fshehur në bagazhet e udhëtarëve.

Vozitësi është paraqitur para drejtësisë shumë shpejt. Nga Gjykata penale e Boulogne-sur-Mer, ai është dënuar me 18 muaj burg, shkruan “La voix du Nord”, përcjell Albinfo.ch.

I punësuar rreth njëzet vite më parë, vozitësi ka pranuar se këtë veprim e ka bërë për shkaqe financiare.