Qëllohet me dy plumba shqiptari, agresori dyshohet të jetë gjithashtu shqiptar

Një shqiptar 23 vjeç është qëlluar me dy plumba, ndërsa agresori, sipas gjitha gjasave shqiptar, ndodhet akoma në arrati, shkruan rheinpfalz.de.

30 vjeçari që të dielën sipas gjitha gjasave ka qëlluar ndaj një burri në Ludwigshafen është akoma në arrati, përcjell albinfo.ch. Ai është parë në Frankfurt, ndërsa vijojnë tentimet për ta kapur. Në ndërkohë, viktima është operuar dhe fatmirësisht nuk ndodhet në rrezik për jetën. Prokuroria gjermane ka vërtetuar lajmin se viktima është shqiptar, ndërsa arsyet e sulmit janë akoma të paqarta. Megjithatë viktima dhe agresori njiheshin mes veti.

„Ne ndodhemi bash në fillimet e hetimeve. Sëpari duhet të sqarojmë rrethanat e afërta të sulmit,” tha prokurori Hubert Ströber. Prokuroria gjermane nuk ka dhënë detaje shtesë, pasi sipas tyre mund të ndikojnë në mbarëvajtjen e ecurisë penale.