Presidenti Meta tregon vijat e kuqe për marrëveshjen për detin

Presidenti i Shqipërisë, Ilir Meta, ka treguar vijat e kuqe të shtetit shqiptar në lidhje me negociatat Shqipëri-Greqi për kufirin detar.

Në një intervistë për gazetën greke “To Vima”, presidenti Meta thotë se “vendimi i vitit 2010 i Gjykatës Kushtetuese, që e anuloi marrëveshjen mes Shqipërisë dhe Greqisë për kufirin detar, jo vetëm që argumentonte pse marrëveshja e vjetër ishte e papranueshme nga ana kushtetuese, por vinte edhe piketat për një marrëveshje të ardhshme. Këto piketa tregonin institucionet, hapat, procedurat dhe metodologjinë që mund të implementohej nëse do të negociohej një marrëveshje e re. Askush nuk mund t’i anashkalojë këto hapa. Nëse një prej këtyre elementëve anashkalohet, injorohet, shmanget ose ndryshohet, nga çdo institucion, para ose gjatë negociatave, është një shkelje e Kushtetutës”, ka thënë Meta ndër të tjera në këtë intervistë, përcjell albinfo.ch.