Toronto mund të bëhet me qendër kulturore shqiptare

Ministri i Diasporës dhe Investimeve Strategjike të Kosovës, Dardan Gashi, është pritur nga ministrja e Migracionit dhe e Shtetësisë e shtetit të Ontarios në Kanada, Laura Albanese.

Në njoftim thuhet se ata kanë diskutuar për ngritjen e një qendre kulturore shqiptare në qytetin e Torontos, përcjell albinfo.ch.

Ministrja Albanese ka qenë një nga mbështetësit më të mëdhenj të promovimit të kulturës shqiptare, duke sponsorizuar edhe ligjin që është miratuar në Parlamentin e shtetit të Ontarios, ku muaji nëntor është shpallur “Muaji i kulturës shqiptare”.

“Në Toronto erdhëm për panairin e minierave dhe për të prezantuar e promovuar Kosovën si potencial për investime. Në kuadër të vizitës kemi takuar edhe shumë bashkatdhetarë tanë që jetojnë në Toronto, afaristë të suksesshëm, nga të cilët kam një kërkesë që duhet t’jua paraqes, të ndihmoni gjetjen e lokacionit për vendosjen e një shtatoreje të Skënderbeut, pasi edhe ky vit është shpallur vit i heroit më të madh shqiptar”, ka thënë Gashi. Ministri kërkoi nga Albanese mbështetjen e Qeverisë së Ontarios për institucionalizimin e mësimit plotësues të gjuhës shqipe, si dhe për ndërtimin e një qendre kulturore shqiptare në Toronto.

Ministrja Albanese, premtoi se do të punojë së bashku me komunitetin.