Oferta për të moshuarit në Gjenevë për të hequr dorë nga vozitja

Gjeneva është një nga qytetet më të mbingarkuara në botë, sa i përket trafikut

Foto ilustrim

Kantoni i Gjenevës po lason një ofertë të posaçme të transportit publik për të moshuarit, për t’i inkurajuar ata që të marrin vendimin e vështirë për të hequr dorë nga vozitja e veturës, shkruajnë mediat zvicerane.

Nga e hëna e ardhshme, 100 të parët e moshës mbi 70 vjeç, të cilët ua kthejnë patentën-shoferin autoriteteve, mund të marrin një kartë të transportit publik vjetor me gjysmë çmimi vjetor, që do të thotë se do t’i kushtojë 200 franga, në vend të 400 frangave, përcjell albinfo.ch.

Përveç kësaj, tre më të shpejtit që shkojnë në zyrat e shërbimit të automjeteve, të hënën nga ora 11:00, do ta marrin atë plotësisht të lirë.

Plani u krijua nga ministri i kantonit të Gjenevës, Luc Barthassat me qëllim që të ndihmonte të moshuarit të bënin “vendimin e vështirë” për të hequr dorë nga patentë shoferi i tyre, shkruan “Le Matin”, transmeton albinfo.ch.

Megjithatë, kjo pritet t’i kushtojë kantonit 20 mijë franga, derisa ka pasur reagime të ndryshme, duke pasur edhe mos pajtime rreth këtij vendimi.

Gjeneva është një nga qytetet më të mbingarkuara në botë, sa i përket trafikut.

Një studim i kohëve të fundit ka treguar se shoferët kalojnë mesatarisht 52 orë në trafik të ngadalshëm çdo vit, ose 16 përqind të kohës së tyre të përgjithshme të vozitjes.