KMDLNJ: Konfiskimi i dokumentacionit nga Policia shqiptare, shkelje e të drejtave të njeriut

KMDLNJ mbështet autoritetet shqiptare që t’ua shqiptojnë dënimin qytetarëve të Kosovës që e shkelin ligjin për komunikacion gjatë qëndrimit në Shqipëri, mirëpo kërkon që të krijohen mundësitë që t’i paguajnë dënimet në pikën më të afërt të paraparë për këtë

Foto ilustrim

Këshilli për Mbrojtjen e të Drejtave e të Lirive të Njeriut ka reaguar pas shumë ankesave që ka marrë nga qytetarët e Kosovës që dënoheshin për kundërvajtje në trafik gjatë qëndrimit në Shqipëri.

Autoritetet shqiptare ua shkelnin të drejtat e njeriut qytetarëve të Kosovës dhe reagimi kishte për qëllim të sensibilizojë autoritetet në Shqipëri dhe në Kosovë për veprimet e policisë shqiptare ndaj qytetarëve të Kosovës që përveç dënimit të shqiptuar, ua konfiskonin dokumentet, duke i detyruar që pas 2-3 ditëve të kthehen në Shqipëri për t’i marrë ato. KMDLNJ këtë e cilëson si shkelje e të drejtave të njeriut dhe përdorim të kushtëzimit për të marrë mito.

KMDLNJ mbështet autoritetet shqiptare që t’ua shqiptojnë dënimin qytetarëve të Kosovës që e shkelin ligjin për komunikacion gjatë qëndrimit në Shqipëri, mirëpo kërkon që duhet të krijohen mundësitë që t’i paguajnë dënimet në pikën më të afërt të paraparë për këtë, e jo t’i detyrojnë të kthehen pas 3-4 ditëve në Shqipëri për t’i marrë ato dokumente të konfiskuara.

KMDLNJ kërkon sqarime nga autoritetet shqiptare dhe kosovare nëse është nënshkruar kjo marrëveshje midis dy vendeve, e që është thellësisht diskriminuese, në të kundërtën duhet të ndërpriten këto veprime diskriminuese, shkelje e të drejtave të njeriut.

“Nëse ka ndonjë marrëveshje eventuale midis dy vendeve, atëherë ajo duhet të funksionojë sipas modelit të Byrove të Sigurimeve midis dy vendeve”, thuhet në reagim.