Lladrovci takon studentët kosovarë në Vjenë

Kryetari i Komunës së Drenasit, Ramiz Lladrovci gjatë qëndrimit në Austri, ka takuar studentët dhe qytetarët kosovarë që jetojnë e studiojnë në Vjenë. Ai gjatë këtij takimi ka thënë se arsimimi i tyre shembullor, puna e përvoja që bëjnë në Austri do të jetë edhe forcë lëvizëse e zhvillimit të vendit, duke ofruar mundësi për të ecur përpara në fushat për të cilat ata kanë studiuar e punuar dhe duke krijuar praktika të mira në punë, përcjell albinfo.ch.

“Diaspora shqiptare ka qenë shumë fuqishëm e lidhur me fatin e vendit dhe në krye të detyrës në çdo rrethanë, duke i dhënë hov jo vetëm çlirimit të vendit, por edhe përkrahjes dhe zhvillimit. Edhe sot, studentët tanë të arsimuar jashtë vendi janë krah i fuqishëm i zhvillimit”, ka thënë Lladrovci gjatë takimit me studentët kosovar në Vjenë të Austrisë.

Takoi homologun austriak të St. Polten

Lladrovci gjithashtu ka zhvilluar një takim me kryetarin e Komunës St. Polten të Austrisë, Matthias Stadler, njëherësh, kryesues i kryetarëve të komunave të Austrisë.

Lladrovci e njohu homologun e tij austriak me punën që bëhet në Drenas dhe ftoi për një vizitë, në një të ardhme me qëllim të thellimit të bashkëpunimit, jo vetëm në ekonomi, por edhe në arsim, turizëm, sport e kulturë.