Qendrat kulturore përjashtohen nga ligji i ri për diasporën

Qendrat kulturore nuk do të përfshihen në Projektligjin e ri për diasporën. Statusi i tyre do të zgjidhet me një ligj të veçantë, por jo me Projektligjin e ri për diasporën, për të cilin Ministria e Diasporës ka hapur tashmë diskutim publik me pjesëtarët e diasporës së Kosovës.
Behar Isma nga Departamenti Ligjor dhe Hamdi Berbatovci, përgjegjës për financa në Ministrinë e Diasporës, kanë sjellë në Cyrih një draft të ri të projektligjit të ri për të dëgjuar vërejtjet dhe sugjerimet e mërgimtarëve të Zvicrës.

Në Qendrën Kulturore në Cyrih, të shtunën mbrëma, Behar Isma nga Departamenti Ligjor ka thënë se me një ligj të veçantë do të rregullohet funksionimi i qendrave kulturore, të cilat nuk e kishin të qartë statusin e tyre juridik që prej themelimit.
Ligji i vjetër ka qenë mjaft konfuz dhe shumë i vështirë për qendrat kulturore kosovare për shkak të procedurave të prokurimit, thanë mysafirët nga Prishtina.

Qendrat kulturore kosovare do të gëzojnë statusin e organizatave joqeveritare, ndërsa do të themelohen nga shteti, por do të funksionojnë jashtë vendit, sipas modelit të “British Council”.

Menaxherët e këtyre qendrave do t’i kenë duart e lira për të tërhequr fonde edhe në vendet pritëse dhe nuk do të jenë të varur nga procedurat e prokurimit të parapara me ligj. Përpilimi i ligjit për qendrat e kulturës do të nisë në fillim të vitit të ardhshëm.

Behar Isma nga Departamenti Ligjor në Ministrinë e Diasporës ka prezantuar edhe ndryshimet e tjera që i parasheh projektligji i ri.
Ai ka treguar se si ky projektligj definon se çfarë do të thotë të jesh pjesëtar i diasporës, përcakton përgjegjësitë e secilit institucion, sidomos sa i përket realizimit të mësimit të gjuhës shqipe në diasporë.

Debat kanë zgjuar nenet me të cilat është paraparë të rregullohet çështja e mësimit plotësues të gjuhës shqipe. Mysafirët nga Prishtina njoftuan të pranishmit se pas marrëveshjes që do të nënshkruhet ndërmjet Kosovës dhe Shqipërisë, do të rregullohet komponenti i financimit, e kjo e bën shumë më të lehtë dhe zbatimin në praktikë të Projektligjit për diasporën.

Ministria e Diasporës me këtë ligj do të ndajë përgjegjësitë me Ministrinë e Arsimit sa i përket mësimit plotësues në gjuhën shqipe.
Pastaj u tha se projektligji sqaron edhe mundësitë e investimeve të diasporës në Kosovë.

Ky projektligj parasheh edhe qarkullimin e kapitalit njerëzor dhe sidomos krijimin e mundësive që profesionistët e diasporës të kontribuojnë në zhvillimin e Kosovës.

Po ashtu me ligj kanë paraparë mbledhjen dhe përditësimin e bazës së të dhënave të biznesmenëve të diasporës.
Isma theksoi në fund se procedimi i projektligjit do të bëhet gjatë nëntorit dhe shumë shpejt do të jetë në duart e deputetëve të Parlamentit të Kosovës.