Posta zvicerane teston robotët edhe në vendet tjera të Zvicrës

(KEYSTONE/Lukas Lehmann)

Posta zvicerane ka testuar robotët e shpërndarjes në zemër të Cyrihut, që nga shtatori i këtij viti. Në bashkëpunim me Jelmoli – Shtëpia e markave, gati 170 furnizime janë kryer brenda qendrës së qytetit në vende të zgjedhura nga marrësit, shkruan ‘stattimes.com’.

Pas këtij debutimi të suksesshëm, Posta zvicerane synon të testojë robotët e shpërndarjes për detyra të mëtejshme të logjistikës në vende të tjera gjatë muajve në vijim. Testi i ardhshëm do të zhvillohet në Dübendorf dhe pritet të zgjasë një vit, përcjell albinfo.ch.

Gjatë gjashtë javëve të kaluara, tre robotët shpërndarës kanë përfunduar rreth 170 kërkesa në qendër të Cyrihut dhe mbuluan rreth 375 kilometra.

Testet e para në vjeshtën e vitit 2016 kryesisht shqyrtuan aspektet teknike dhe sociale, të tilla, si besueshmëria materiale dhe reagimet nga kalimtarët.

Këtë vit, Posta zvicerane do të fokusohet gjithashtu në integrimin e teknologjisë në zinxhirët ekzistues të furnizimit.

Gjatë pilot projektit të fundit, robotët u përfshinë në dyqanin online jelmoli.ch si një opsion i shpërndarjes, i cili u mundësoi atyre të testohen në kushte reale.

Së bashku me partnerët e sektorëve të ndryshëm, testet tani do të vazhdojnë në vende të tjera në Zvicër.

Edhe një herë, Posta zvicerane do të bashkëpunojë me kompani të përzgjedhura.