NZZ, media më e besueshme në Zvicrën gjermane

Në pjesën frankofone, besueshmërinë më të lartë e ka programi i radios SRG “La Premiere” dhe në atë italiane po ashtu programi radiofonik “Rete Uno”

Përkundër fjalëve të shumta që qarkullojnë mbi “Fake News” (lajme të rreme), njerëzit në Zvicër vazhdojnë t`i konsiderojnë edhe më tutje të besueshme mediat zvicerane.

Këtë konstatim e ka arritur një studim reprezentativ që e ka realizuar ndërmarrja për këshillim medial, Publicom.

Studimi në fjalë nuk ka mundur ta vërtetojë thënien e përsëritur shpesh mbi humbjen e besueshmërisë së mediave.

Mediat më të besueshme në përgjithësi vazhdojnë të jenë gazetat me abonim dhe radiot e televizionet me financim publik.

Në Zvicrën gjermane, gazeta Neue Zürcher Zeitung zë vendin e parë në këtë konkurrencë, transmeton albinfo.ch. Ndërsa në pjesën frankofone të Zvicrës besueshmërinë më të lartë e ka programi i radios SRG “La Premiere” dhe në atë italiane po ashtu programi radiofonik  “Rete Uno”.

Për të nxjerrë këto vlerësime janë anketuar më shumë se 5000 persona të moshave të ndryshme.