Rüschlikon, komuna më tërheqëse në Zvicër

Asnjë nga qytetet e mëdha nuk hyri në top-20. Cyrihu ishte në vendin e 22-të. Gjeneva ishte në vendin e 45-të, Basel 126, Lausanne 143 dhe Berna mori vendin e 168-të

Komuna e Rüschlikonit afër liqenit të Cyrihut është renditur në vendin e parë apo më atraktivja për të jetuar në Zvicër, shkruan “The Local”.

Kjo renditje është bërë nga revista “Weltwoche”, që krahasoi të gjitha 924 komunat në vend me një popullsi prej të paktën 2 mijë banorëve, përcjell albinfo.ch.

Për këtë renditje janë marrë parasysh 50 faktorë, duke përfshirë këtu cilësinë në zonat e banimit, sigurinë, nivelin e taksave, punën e ofertat kulturore. Kështu Komuna e Rüschlikonit është zgjedhur si më atraktivja në Zvicër.

Rüschlikon, që ka vetëm 5.600 banorë kryeson renditjen përpara dy komunave qendrore zvicerane: Meggen në kantonin e Luzernit dhe Zug.

Komuna më tërheqëse në Zvicrën frankofone ishte Chêne-Bougeries, në kantonin e Gjenevës, që mori vendin e nëntë në renditjen e përgjithshme.

Renditja më e lartë për Zvicrën italiane ishte vendi i 12-të për Comano në distriktin e Luganos.

Asnjë nga qytetet e mëdha nuk hyri në top-20. Cyrihu ishte në vendin e 22-të. Gjeneva ishte në vendin e 45-të, Basel 126, Lausanne 143 dhe Berna mori vendin e 168-të.

Vendi më i sigurt për të jetuar thuhet të jetë Schwende në kantonin e Appenzell Innerrhoden, me më pak se një krim të regjistruar për çdo 1.000 banorë.