Chur: Bie në lumë duke bërë selfi

Foto Polizei Chur/Coire

Një turiste 26-vjeçare nuk do ta harrojë kurrë “selfin” e fundit që e bëri në Chur/Coire. Ajo është rrëzuar në lumin Rhin ndërsa ishte duke e fotografuar veten me telefonin e saj.  Për fat të mirë, ajo nuk është lënduar dhe ka arritur të kapej në një shkëmb. Më pas, një helikopter ka shkuar ta shpëtojë.

Incidenti ka ndodhur nën një urë mbi lumin Rin, ka bërë të ditur policia e qytetit të Chur/Coire në deklaratën e saj. Gruaja e re ka humbur ekuilibrin ndërsa përpiqej ta fotografonte veten me lumin në sfond para se të binte në ujë. Ajo është bartur nga uji për rreth një kilometër para se të arrijë të ndalej në një shkëmb, duke pritur për ndihmë.

Helikopteri Rega ka arritur ta shpëtojë pas pak kohe. Turistja e re nuk është lënduar dhe pas një kontrolli të shkurtër mjekësor është kthyer në shtëpi.