21 gradë në fund të dhjetorit në Zvicër!

Në Cevio dhe Maggiatal (Lugina e Maggia-s) të dielën, më 25 dhjetor janë regjistruar temperatura prej 20.9 gradë

Erërat që frynë nga veriu, kanë ngritur gjatë fundjavës së Krishtlindjes zhivën e termometrit në mbi 20 gradë në pjesën jugore të Zvicrës, në Tiçino.

Kështu në Cevio dhe Maggiatal  (Lugina e Maggia-s) të dielën janë regjistruar temperatura prej 20.9 gradë. Nga ana tjetër në Acquarossa në  Blenoiatal (Lugina e Blenoia-s) termometri ishte ngjitur në 19.6 gradë, transmeton albinfo.ch. Pak më freskët, 14.7 gradë ishte në Poschiavo të Puschlav-it.

As në javën që posa filloi nuk do të ketë borë, bëjnë të ditur në shërbimin meteorologjik të SRF.

Temperatura më e lartë e matur deri në këtë vit në periudhën në mes 20 dhe 31 dhjetorit ka qenë ajo e 21 dhjetorit të vitit 1987, 20.5 gradë, e regjistruar në Acquarosa dhe po e njëjta edhe në Locarno, më 21 dhjetor 2008. Kështu, temperatura e shënuar të dielën, më 25 dhjetor 20.9 gradë, përbën rekord për këtë periudhë të vitit.