Valton Jakupi, pjesë e dy projekteve filmike franceze

Karriera e tij artistike si aktor dhe regjisor po dëshmohet jo vetëm në filmat shqiptarë, por edhe në ata të huaj. Valton Jakupi, pas sukseseve në projektet e tij artistike, ai është duke punuar për disa projekte filmike franceze. Aktori shqiptar nga Bujanoci, i cili jeton në Zvicër, është zgjedhur nga producenti francez Murphy  François që të interpretojë në filmin “Le Sodat Perdu” (Ushtari i humbur).

Valton Jakupi në këtë film paraqitet në një ngjarje tragjike të një ushtari të humbur pas një fronti të bërë. Ushtari humb nga kolegët e tij dhe ne një vend të huaj nuk di ku të strehohet dhe kërkon rrugëdalje dhe shpëtim në malet e një vendi të panjohur, ku pasi i shpëton një beteje të përgjakshme, vritet pa qëllim nga një gjuetar i malit.

Bashkëpunimi i Valtonit më produksionin francez ka ardhur përmes kompanisë së tij “International Film Europe Sëiss”, ku edhe më herët kishin qenë co-produksion i disa projekteve të tyre.
“Aktualisht kemi të bëjmë më dy projekte  filmike, por që shpresojmë të vazhdojmë me bashkëpunim deri në tetë projekte. Njëra është “Ushtari i humbur”, ku veç kanë përfunduar xhirimet, ndërsa projekti tjetër është “Piktura e papërfunduar”, në të cilin do të fillojmë xhirimet në shtator dhe do të jetë një film për pjesëmarrje në festivale evropiane”, thotë regjisori Jakupi për albinfo.ch.

Në filmin “Ushtari i humbur”  Valton Jakupi tregon se ishte kërkesa e producentëve të filmit që ai ta marrë këtë personazh, por me kusht që ta lëshojë mjekrën. Kjo për shkak të ngjashmërisë së tij me personazhin e imagjinuar të filmit. Në këtë film Valtoni do të jetë edhe në cilësinë e regjisorit të dytë.

Ndërsa për vazhdimin e bashkëpunimit në filmin “Piktura e papërfunduar” ishte producentja e filmit nga Amerika Latine, Marie Silmei, që në këtë film do të jetë edhe në pozitën e drejtoreshës së fotografisë, e cila me ngulm ka kërkuar që ta bëjmë edhe një film, me tematikë për refugjatët.

“Filmi ‘Piktura e papërfunduar’  ka për tematikë ngjarjet e refugjatëve, konkretisht bazohet në mosrespektimin e  të drejtave të fëmijëve refugjatë. Është një film kritik për shtet e fuqishme botërore që të bëjnë më shumë për mbrojtjen e fëmijëve nga rreziqet e paparashikuara”, shprehet Jakupi.
Në filmin “Piktura e papërfunduar”, Valton Jakupi do të jetë vetëm në cilësinë e regjisorit, ndërsa siç bën me dije ai, do të marrin pjesë edhe 3-4 aktorë shqiptarë.