Zviceranët i kanë refuzuar 2500 frangat në muaj pa punuar

78 për qind e votuesve votuan kundër inicitivës për të ardhura bazë për të gjithë në Zvicër

(KEYSTONE/Peter Schneider)

Sipas rezultateve paraprake të referendumit të së dielës, 78 për qind e votuesve votuan kundër inicitivës për të ardhura bazë për të gjithë në Zvicër, ndërsa 22 për qind e mbështetën propozimin, shkruan albinfo.ch

Në referendumin e parë të tillë në botë,  përkrahësit e iniciativës kishin propozuar aplikimin e të ardhurave të pakushtëzuara bazë, 2500 franga zvicerane (2.450 dollarë) në muaj për të rriturit, duke përfshirë edhe të huajt që jetojnë 5 vite pandërprerë në vend, dhe 625 franga për fëmijët nën 18 vjet.

Në të njëjtën kohë, ky propozim ishte për të ruajtur koston e përfitimeve të papunësisë, pagesat sociale dhe pensionet.

Sipas përkrahësve të iniciativës, me futjen të ardhurave bazë të pakushtëzuara do të mbështetnin dinjitetin njerëzor dhe shërbimet publike në vend.

Zviceranët po ashtu votuan kundër iniciativës“pro shërbimeve publike” me  67,6 %, si dhe kundër iniciativës “për financim korrekt të komunikacionit” me 70,8 %.